--------------------------------------------------------------------------------

سعد علوش :

يا ابراهيـم مـادام الليالـي تـدور
إدع ربك عسـاه يوسـع فجوجهـا
شاعرٍ ممتلي حب وطموح وشعـور
كل ما شاف حلوه قال انا زوجها ..!

ابراهيم الشيخي:

اجعل السر في مستودعات الصدور
لا يهورك طيش الناس وهروجهـا
لاتزوج بحلوة مع غـلاء المهـور
ما معك سعر حناهـا ولا روجهـا

سعد علوش :

راعي النخل ماهو شرط بايع تمور
وعاقل القوم ما يضحكه مرجوجها
لاتسوي مثل مجنون سبع البحـور
يحذف حصا شواطيها على موجها

ابراهيم الشيخي:

بين حب الظهور وبين قصم الظهور
حجةٍ ضحـك فالجهـا بمفلوجهـا
سيري يا بواخر وانتظم يـا عبـور
الرياح استقـرت وارتكـد هوجهـا

سعد علوش:

لا يطفون نور ولا يحطون سـور
ما بقا في الاراضين ارض وادوجها
الفتن اصبحت تضحك ولاة الامور
انتظر شوف ياججهـا وماجوجهـا

ابراهيم الشيخي:

انت محدٍ يلومك لو شهادتـك زور
المحاكم معـك مفتـاح لدروجهـا
لكن بحكم قربك من طوال الشبور
كيف تسمح بنصر الغرب وعلوجها

سعد علوش:

يعلم الماورائيـات ربٍ غفـور
لا تدقـق فعادلهـا ومعووجهـا
ودك ان الجماله ما تسوى بشور
هذي هي الرجال وهذا هو فوجها

ابراهيم الشيخي :

المهم لا يجي بيني وبينـك فتـور
وانت دولـه بثروتهـا ومنتوجهـا
كل من شال سيف وحط رايه يثور
اعذر الخيل لا ضاقت من سروجها

محاوره جدا ً رائعه لشاعرين غنيين عن التعريف
يعطيك العافيه يالمرعب ونطلب المزيد بمثل هذه الروائع
تحياتي لك

الاخ يوسف اسعدني مرورك الرائع
سلمت لنا